أعلنت شركة إتش بي HP عن أحدث أجهزة اللاب توب الجديدة عندها واللي وصفته بأنه أنحف لاب توب في العالم والإعلان ده تم خلال مشاركتها في المؤتمر اللى بيتعمل في مدينة فرساي في فرنسا. شركة إتش بي HP أطلقت إسم Spectre 13.3 على اللاب توب الجديد اللي سمكه مش بيعدي 10.4 مللي متر ولو كنت مش قادر تتخيل السمك بتاعه أد إيه فهو تقريباً نفس سمك بطارية من نوع AAA. وزن الجهاز الجديد هو 1.1 كيلو جرام، الشاشة بمقاس 13.3 بوصة وبدقة 1080 بكسل، البروسيسور من نوع Intel Core i5 أو Intel Core i7، الذاكرة الداخلية بحجم 512 جيجا بايت، حجم الرامات 8 جيجا بايت، البطارية بتشتغل لمدة 9 ساعات ونص متواصلة، مزود بتلات منافذ يو إس بي USB من نوع سي C ومنفذ من نوع Thunderbolt. وهتفتح الشركة باب التسجيل المسبق للجهاز يوم 25 أبريل الحالي بأسعار تبدأ من 1170 دولار أمريكي أو 1250 دولار أمريكي وهيكون متاح في الستورز إبتداء من يوم 22 مايو اللى جاي. وأعلنت شركة إتس بي إنها هتعمل نماذج محدودة خاصة مكونة من مواد زي الدهب عيار 18 قيراط وكريستال شواروفيسكي.
